A Copa Galicia define as súas semifinais: Leyma-Obra e Breogán-Ourense, un torneo con sabor a derbi

O sorteo da Copa Galicia 2025 xa debuxou o camiño cara ao título e deixou emparellamentos de alto voltaxe. Dun lado, o Monbus Obradoiro e o Leyma Coruña reeditarán un enfrontamento que nos últimos anos se ten convertido nun clásico da pretemporada. Do outro, o Río Breogán defenderá a súa condición de vixente campión fronte ao Club Ourense Baloncesto, nun pulso que tamén destila rivalidade e proximidade O gran atractivo para o Leyma será exercer de anfitrión, xa que toda a edición disputarase no Coliseum da Coruña, un escenario que promete un ambiente impoñente. A cita permitirá, ademais, o reencontro entre os de Moncho Fernández e o proxecto herculino, que afronta esta campaña coa ilusión de consolidarse na elite tras o ascenso. O Breogán parte como favorito para repetir éxito, aínda que o Ourense procurará dar a sorpresa nun torneo onde os duelos directos adoitan deixar marxe para a épica. As semifinais xogaranse o venres 5 de setembro (18:30 e 20:00 horas), mentres que a gran final terá lugar o sábado 6 de setembro ás 20:00 horas. A Federación Galega de Baloncesto, organizadora do evento, xa puxo á venda os abonos a través da plataforma Ataquilla, con prezos dende os 19,60 euros. A Copa ‘Xunta de Galicia’ regresa así á cidade herculina, ofrecendo unha nova oportunidade para gozar do mellor baloncesto autonómico nun torneo que nunca perde a súa esencia: rivalidade, ambiente festivo e a paixón de catro afeccións entregadas.